CADC VC thlana duty turte chhuak

Chakma Autonomous District Council (CADC) huam chhungah March 12, 2025 (Nilaini) hian village council (VC) inthlanpui neih a ni dawn a, inthlan buaipuitu tur returning officer (RO) leh venhimna hna thawktu tur (security official)-te chuan nimin khan Lawngtlai aṭangin Chawngte an pan.

Nimina tirh chhuahte hi RO mi 88 leh security official 88 an ni a; zing dar 9:30-ah chhuak ṭanin, chawhma dar 11-ah an chhuak kim. Duty turte hian vawiin hian Chawngteah training an nei leh ang a, naktukah an duty-na tur polling station ṭheuh an pan ang.

CADC huam chhungah hian VC 88 awmin, seat 516 a awm a; voter 37,883 awmin, mipa 19,162 leh hmeichhia 18,721 an ni. March 12, Nilainiah vote thlak a ni ang a, vote thlak zawhah vote chhiar nghal tur a ni.