Cabinet-in ADA ṭhiah remti Lok Ayukta rules an pawm

Council of Minister chu nimin khan Secretariat Conference Hall-ah chief minister Lal Thanhawla hoin an ṭhukhawm a, Aizawl Development Authority (ADA) ṭhiah rawtna an pawm. Eiruk dona atana ruahman Lok Ayukta rules pawh an pawm.

Cabinet meeting-ah hian agenda 14 a awm a, chung zinga 11 chu pawm a ni. Agenda pangngai bakah, additional item pasarih chhawp chhuah a ni a, chungte chu pawm vek a ni.
Cabinet meeting rel a nih dan chuan, ADA ṭhiah a nih tâk avangin an mawh­phurhna leh hnathawh ṭhin zawng zawng chu Aizawl Municipal Council (AMC) kutah dah a ni.
ADA hi kum 2006 khan din a ni a, chairman chu Chief Minister niin, vice chairman chu Lalfakzuala, IAS (Rtd.) a ni. Vice chairman hi a term a tawp hnuah vice chairman dang ruat a ni lo a, AMC chief executive officer (CEO)-in an hmui a ni.
Tun dinhmunah ADA-ah hian mi 80 chuang an thawk a, mi eng emaw zat chu AMC-ah sawn an ni a, AMC-ah post a awm loh avangin ADA-a an post angin an awm. ADA ṭhiah a nih tâk avang hian thawktute chuan engtin nge an awm zui zel dawn an hriat loh thu Vanglaini palai an hrilh.