KHAWTHLIR

Freshers’ Social
J Thankima College chuan nimin khan Vanapa Hall-ah 'Freshers’ Social' an hmang a, Social Welfare minister PC Lalthanliana'n a hmanpui. Govt. Johnson College pawhin nimin vek khan Electric YMA hall-ah zirlai lut tharte lawmna hun leh zir chhuakte thlahna hun an hmang. He college aṭang hian zirlai 116 in degree course an zo a ni. Nilaini khan Government Aizawl West College pawhin Freshers' Induction cum Social Meeting chu Vanapa Hall-ah an hmang a, minister R Lalzirliana chu khuallian a ni.

Anti Dengue Month
Nimin khan Mamit I&PR conference hall-ah 'Anti Dengue Month' pualin hun hman a ni a, senior medical officer, Dr. Lalrinthangi'n Mizorama dengue din-hmun te, dengue natna vei theih dante leh a inven dante a sawifiah.

Naupang humhalhna
Champhai District Child Protection office buatsaihin, nimin khan Champhaia IPR conference hall-ah naupangte dikna leh chanvo humhalhna leh an chunga pawikhawihtute hremna dan chungchang zirna media-te tan buatsaih a ni a; Champhai district chhunga chanchinbu mi ṭhahnem tak an tel.

Saiha TB Centre
Saihai District TB Centre chu nimin khan hawn a ni. Centre hawnnaa Saiha CMO Dr HT Phosa tarlan danin, Saiha district-ah ngawr (TB) an nih leh nih loh mi 7,300 endik an ni tawh a, chung zinga 2,209 chuan TB an vei tih hmuhchhuah a ni.

Zirna sawiho
New Education Policy siam thar tur chungchangah nimin khan Hnahthial Bazar Hall-ah inrawn khawmna neih a ni a, Lunglei DEO Lalrambuatsaiha'n a hmanpui. Hnahthial khawpui chhunga zirtirtu aiawh pakhat ṭheuh leh SMC member aiawh te, School Education department leh SSA thawktute an tel a ni.