Mizoram hmar lam district pangaah Thla 6 chhunga mahni intihlum mi 47

Mizoram police-a Northern Range (NR) huam chhunga police officer-te chuan nimin khan Police Headquarters-a Arya Mess-ah Half Yearly Crime Review Meeting an nei. Kumin January-June chhungin NR chhungah mahni intihlum mi 47 an awm thu tarlan a ni.

Police-a Northern Range hian district panga - Aizawl, Mamit, Kolasib, Champhai leh Serchhip district-te a huam a, nimina meeting hi DIG (NR) LT Hrangchal-in a ho a; district pangaa SP-te leh Traffic SP leh SDPO-te an tel.

Review Meeting-a tarlan danin, kumin kum chanve, January-June chhungin hmar lam district pangaah thubuai 1,007 ziah luh a ni a, nikum January-June chhunga ziah luh 1,092 aiin 85-in a tlem zawk. Thubuai ziah luh hi Aizawl district-ah a tam fál hle a, thubuai 563 ziah luh a nih laiin, a hnaih bertu Kolasib district-ah chuan 165 ziah luh a ni.

Kum chanve chhunga thubuai ziah luh kum 2014 aia kum 2015-a a tlakhniam laiin, mahni intihhlum zat police-in an chhinchhiah chu kuminah a tam zawk.January-June 2014 chhunga mahni intihlum an chhinchhiah zat chu 36 an nih laiin, kuminah chuan mi 47 an ni.

Kuminah hian kum danga la tih ngai loh, Prevention of Children from Sexual Ofences Act (POCSO) hnuaiah kuminah thubuai 38 an ziah luh a ni bawk.

DIG (NR) LT Hrangchal chuan, police-a complaint thehluttute chu police-te VIP an nih thu sawiin, "An lungawina ngei turin hna kan thawk tur a ni," a ti a; complaint thehluttute pe bawp a, an lingawi leh lungawi loh zawt ṭhin tur leh, an hmazawn ṭheuha nasa lehzuala ṭan la ṭheuh turin police officer-te chu a chah a ni.