Project-a ruahmannaa tel lo Consultancy firm rawih an ni

Comptroller and Auditor General of India (CAG) Report 2013-14 in a tarlan danin, Mizoram Tourism Development Authority (MTDA) chuan, project-ah consultancy firm rawihna tur tih tel a ni lo chungin consultancy firm rawihna atan cheng nuai 150.09 a ruahman tih a tarlang.

CAG Report tarlan danin, kum 2011 leh 2013 khan sorkar laipui chuan project pariat atan cheng nuai 4,193.267 a pe a; chutah chuan consultancy firm rawihna tur telh a ni lo a, mahse MTDA chuan consultancy firm pariat ruaiin, a rawih man atana an inremsiamna chu cheng nuai 150.09 a ni. August 2014 thleng khan consultancy firm hnenah hian cheng nuai 116.21 pek a ni tawh.

CAG Report chuan, "Sorkar laipui chuan MTDA-in DPR a thehluh hmangin heng project pariatte hi an pawm vek tawh chunga DPR siam tura consultancy firm rawih a nih avang hian thil rinhlehawm tak a awm. Project atana hman tur pawisa pawhpên a ni hian hnathawh a tihchhiat phah thei a ni," a ti.

Mizoram sorkar chuan consultancy firm-te chu working estimate duang tura rawih an ngaih thu CAG hnenah an thlen thung.