Sorkar laipui policy zirna buatsaih

Rural Development department-in sorkar laipui scheme hrang hrang a khawihte chu, nimin khan Brig. C Vankunga Shopping Centre conference hall, Kolasib-ah Bilkhawthlir RD Block hnuaia VEC hruaitute zirtir an ni.

Training hi Bilkhawthlir BDO Lalfakzuala'n kaihruaiin, SIRD core faculty R Lalthanmawia chuan MNREGA chu September, 2005 aṭangin India rama district 200 ah kalpui ṭan a nih thu sawiin, "Hemi kum hian Mizoramah chuan Lawngtlai leh Saiha dist.-ahte kalpui a ni. Kum 2008 aṭang­in India rama district zawng zawngah kalpui a ni," a ti.

R Lalthanmawia sawi danin, MGNREGA hnuaia hnathawh tur chu phal chin nei a nih avang in dan leh guideline in a huam loh thawh tir emaw, thawh phalsaktu chu hrem theih a ni. Phal loh thil thawhtirtu chuan a mimal sum aṭanga hlawh a pe tur a ni. Job card chu mi harsa, inhlawh ngai ngawih ngawihte leh inhlawh duh ngeite chauh neih chi a ni , Mizorama inhlawh mamawh lem lo leh thawk peih lo ten kan nei hi thil dik a ni lo.

APO Lalchhanhimi'n IAY kalpui dan leh inkaihhruaina, JEO (Vety) B Zuiliana'n IAY sum kalpui dan leh BMM Diana K Hmingthanpari'n IAY sum kalpui dan an zirtir thung.