Sihphirah Health Mela buatsaih

Health department-a Aizawl East District chuan, nimin khan World Population Fortnight 2015 pualin Sihphir community hall-ah Health Mela an buatsaih a, Assembly deputy speaker R Lalrinawma'n a hmanpui.

R Lalrinawma chuan, Aizawl East District-ah mihring 2,64,731 awm anga chhût a nih thu sawiin, "Nu leh naupang hriselna leh dam khawchhuahna atan family planning fel neih a pawimawh. Nuin hrisel taka fa a neih theih nan a taksain chakna a khawl khawm nan kum thum dan tala fa a neih a pawimawh a ni," a ti.

R Lalrinawma chuan, "Family planning tih hian nau pâi lo tura insiam ngawr ngawr a ni lo," a ti a, chhang khât tâwk leh enkawl zawh tâwka fa neih inzirtirna a nih thu a sawi.

Health Mela hi Aizawl East CMO Dr C Lalzepuii'n a kaihruai a, Dr Chawngthanchhunga'n family planning chung­chang a sawifiah a ni.