MSHRC din thuai tum

Home minister K Sapdanga chuan nimin khan Assembly session-ah BJP member Dr K Beichhua zawhna chhangin, Mizoram State Human Rights Commission (MSHRC) din turin hmalak mek a nih thu House a hrilh a, "Din thuai tum a ni," a ti.

K Sapdanga chuan, MSHRC-a thawktu hrang hrangte post siamna notification October 11, 2024-ah tihchhuah a nih thu sawiin, "MSHRC chairperson leh member atana ruat tur rawt/zawngtu search committee November 11, 2024 khan din a ni. MSHRC hian a din dan tur anga hna a thawh theih nan head of account hran siam tura hmalak mek a ni," a ti a; MSHRC tan office building leh acco­modation ngaihtuah a nih thu a sawi.