Aizawlah Sanjha Utsav neih a ni

Nimin khan Aijal Club Park-ah 'Sanjha Utsav (SHG Mela) Festival of Togetherness’ buatsaih a ni a, Urban Development & Poverty Alleviation minister K Sapdanga'n a hawng.

Sanjha Utsav hi March 14, 2025 thleng buatsaih tur a ni a, self help group (SHG) eng emaw zatte kutchhuak thil chi hrang hrang pho chhuahna stall 27 leh ei tur zawrhna stall pasarih a awm.

UDPA Minister chuan, ram pum huap exhibition buatsaihnaa Mizoram aṭanga UDPA enkawl SHG thlan an ni chu lawmawm a tih thu a sawi a, "SHG-te tihmasawn zel tur hian UDPA department thawktute an inpeih reng," a ti a; SHG-te chu tih ve tur an neih thu sawiin, loan rulh, hmalak dan tur ruahmanna felfai siam leh thawhhona boruak ṭha siamte ngai pawimawh turin a chah.

K Sapdanga chuan, UDPA department kaltlanga khawpuia chhungkaw khawsak dinhmun chawikanna atana nu hoin an theihna leh thiamna chhung khawma hma an laho ṭhin chu ṭha a tih thu te, ram leilung hausakna humhalh nan leh khawtlang fai leh thianghlim siam turin hman khat daih sarâng hman loh a pawimawh thute a sawi bawk.

SHG Mela hawnna inkhawmah hian UDPA secretary Lalmalsawma Pachuau leh director Jacob Lallawmpuia te pawhin thu an sawi a; SHG hma la ṭha panga - Chawngtinleri SHG, Jenny SHG, Mass SHG, Nuihiau SHG leh Sari SHG-te hnenah lawmpuina thilpek hlan a ni.

SANJHA UTSAV HAWNNAA TARLANTE

* Mizoramah kum 2014-15 aṭangin district khawpui leh census town 15-ah Deendayal Antyodaya Yojana - National Urban Livelihood Mission (DAY-NULM) kalpui a ni.

* DAY-NULM hnuaiah hian Social Mobilisation & Institutional Development, Employment through Skill Training & Placement, Skill Development Training, Self Employment Programme leh Support for Urban Street Vendors-te kalpui ṭhin a ni.

* Self help group 1,520 an awm mek.

* Skill training paltlanga certificate nei mi 10,733 zinga mi 5,158-te'n thiamna an zir chhuah hmangin hna an thawk mek.

* Mimal leh a huhoa eizawnna bul ṭanna tur leh tihchangtlunna tur bank aṭanga loan la mi 2,024 an awm tawh.

* Hmarchhak leh Himalayan region zinga DAY-NULM hnuaia hma la ṭha state thlannaah Mizoram chuan kum 2021-22 leh kum 2022-23 khan Systematic Progressive Analytical Real Time Ranking award lawmman pakhatna a lo dawng.

* DAY-NULM kal lai chu September 2024 khan a tawp.

* DAY-NULM thlakna tur ‘New Mission on Urban Poverty Alleviation’ chu sorkar laipuiin a duang tawh a, October 2024 aṭangin India rama khawpui 25-ah pilot project kalpui niin, Aizawl pawh pilot project kalpui zingah a tel.