KHAWTHLIR

Ngaihdan la siam lo

Home minister K Sapdanga chuan, kum thar zana hâlpuah leh halmawi hâlna tur hmun bik siam a, hâl hun chhung tur pawh bituk chungchangah sorkarin ngaihdan a la siam rih loh thu a sawi. Hemi chungchangah hian Home Minister-in nimin khan Assembly session-ah ZPM member H Ginzalala zawhna a chháng a ni.

A tláwmin lei theih

Art & Culture minister C Lalsawivunga chuan ZPM member Jeje Lalpekhlua zawhna chhangin, MUP, YMA, MHIP leh NGO dangte tan hnam puan hrang hrang leh bungruate a diltute'n 25% tumin lei theih a nih thu a tarlang. Minister-in a sawi lante chu - puanchei, kawrchei, ngotekherh, hmàrám, pawndum, thangchhuah thân, vakiria, darkhuang, darbu, PA set leh acoustic guitar a ni.

Pump khâr dawn

All Mizoram Petroleum Dealers' Association chuan March 14, 2025 (Zirtawpni) hian an din champha an lawm dawn a, hemi ni hian Mizorama petrol pump-te khâr a ni dawn. AMPEDA hian mipui hriatthiamna an ngen a ni.

Ui khuahkhirh

Mamit district magistrate K Laltlawmlova chuan thupek chhuahin, Mamit district chhunga ui vulhtute chu an uite ṭha taka khuahkhirh tur te, mi dang tana harsatna siam zawng leh hnawksak zawnga vulh lo tur te, khawlaiah ui chhuah zalen lo tur leh, an ui vulhte zun leh êk khawlaiah hnutchhiah lo turin a hriattir. Thupek zâwm lote chu dan anga hrema pawisa chawitir theih leh ui tihralsak theih a ni tih a tarlang bawk.

Ambulance hlân

Adviser to CM (Political) Lalmuanpuia Punte, MLA chuan a bial chhung Khawlailung damdawi-in (Primary Health Center)-a hman turin nimin khan ambulance a pe. Ambulance inhlanna hun hi MLA Lalmuanpuia Punte pisaah neih a ni a, MLA hian Khawlailung PHC medical officer Dr Vanlalhruaii hnenah a hlan a ni.

Kawng khâr dawn

Aizawla Venghnuai kawtchhuah aṭanga Venghnuai khelmual inkar kawng thawm ṭhat a ni dawn a, hei vang hian vawiin leh naktuk hian chawhma dar 10 leh tlai dar 4 inkarah kawngpui khâr a ni dawn.

Chawimawina hlàn

Saitual district election officer Dr Lalngura Tlau, bawrhsap chuan February 2025-a village council inthlanpuia Saitual district-a booth level officer thawk ṭha bera thlan RLC Lalṭhatluanga, Saitual-V hnenah nimin khan chawimawina a hlan. Chawimawina hian thuziak leh pawisa a keng.

Development Plan

Lunglei District Skill Committee chu an chairman Navneet Mann, bawrhsap hoin nimin khan DC conference hall-ah an ṭhukhawm. Lunglei District Skill Development Plan 2025-26 ruahman dan tur sawiho a ni.

Women’s Day hmang

Mizoram University-a UGC - Women’s Studies Centre chuan International Women’s Day pualin nimin khan MZU Education Conference Hall-ah ‘International Symposium in Commemoration of International Women’s Day' an hmang. Hun hman hi UGC-Women’s Studies Centre honorary director Prof. Zoengpari'n a kaihruai a, khuallian MZU pro-vice chancellor Prof. Pravakar Rath-a'n thu a sawi a, resource person pahnih an awm a ni.