NIT, Mizoram-in EFCC-a sum a chawi tur nuai bo turin MP-in Central a ngen

Nimin khan Parliament budget session thawh hnihna chu ṭan a ni a; Rajya Sabha MP K Vanlalvena'n thu sawiin, National Institute of Technology (NIT), Mizoram hmun chungchanga NIT-in Mizoram Forest department-a sum a chawi tur chu nuai bo turin sorkar laipui a ngen.

Rajya Sabha MP chuan, NIT, Mizoram chu India sorkarin kum 2009-a NIT a din thar 10 zinga pakhat a nih thu a sawi a, "A tirah chuan VNIT Nagpur aṭanga bul ṭan a ni a, July 2011-ah Mizorama sawn luh a ni. Din a nih aṭanga tun thlenga anmahni pualin building an la nei lo," a ti.

K Vanlalvena chuan, NIT, Mizoram chuan Lengpuiah campus an buatsaih ṭan laiin Riverine Reserved Forest chhunga mi a ni tiin Forest department aṭangin complaint a luh thu leh, NIT chu sum tam tham tak chawi turin Forest department-in an phût avangin harsatna an tawk tak thu a sawi.

NIT, Mizoram harsatna sutkiansak tura Union Forest & Climate Change minister Bhupendra Yadav hnena a ngennate tihhlawhtlin a nih avanga a lawm thu sawiin K Vanlalvena chuan, "NIT, Mizoramin Forest department hnena pawisa kan chawi tur zat chu nasa taka tihhniam ni tawh mah se, Mizoram sum harsatna hriatsak a, a bo a bâng awm loa nuai bosak turin sorkar laipui ka ngen a ni," a ti.