ZNP a sorkar hunah Lalduhoma'n Sum harsatna chinfel theih a inring

ZNP president Lalduhoma chuan, kum nga, 2015 aṭanga 2020 thlenga sorkar laipuiin Mizoram sorkar tana sum a pek tur chu cheng vbc. 30584.21 niin a sawi a "Mizoram sorkar sum dinhmun chhe lutuk hi sorkarna kan chan chuan kan chinfel thei ang," a ti.

Lalduhoma hian nimin khan Aizawl Press Club-ah thuthar thehdarhtute kâwmin, Mizoram sorkar sum dinhmun leh sum harsatna chinfelna tura ruahmanna an neihte a sawi a ni.

ZNP President-in Central aṭanga kum 2015-2020 chhunga Mizoram sorkar sum hmuh tur zat a sawi chu: Revenue Deficit Grant-ah vbc. 12183, Capital Tax aṭangin vbc. 18197 leh Municipal atan vbc. 96.17 a ni a, a vaiin vbc. 30584.21 a ni. Kum 2015-16 chhung bikah Revenue Deficit Grant atan vbc. 2139, Capital Tax aṭangin vbc. 2670 leh Municipal tan vbc. 11.54, a vaiin vbc. 4835.54 a ni. Heng bakah hiansum hmuhna tur dang - NEC, NLCPR, DoNER, ACA, SPA-te a la awm thu a sawi.

Zawhna chhangin Lalduhoma chuan, "Kum 2015-2020 chhunga Mizoram Plan Fund tur hriat lawk vek a ni tawh, state dang pawhin budget puitling an phar tawh. Eng emaw tihfel ngaite a awm ṭhin avangin tun hma chuan Planning Commission-in plan discussion an buatsaih ṭhin. Tunah chuan Planning Commission hunlai ang khan kan kal tawh lo," a ti.

Sorkar sum harsatna chungchang sawiin, Duhoma chuan, sorkar hotute'n 'Bat tam changkanna' an tih avangin Mizoram leiba a tam tial tial a, Mizoram leiba chu sorkar laipuiin a ngaimawh hle a, Mizoram hrêkna tur hrang hrang a siam tawh niin a sawi a; kum 2013-14-a leiba chu cheng vbc. 5455.95 a tling tawh tih sawiin, "Mimal tinin Rs. 49,725 theuh ba ang kan ni," a ti.

Lalduhoma chuan, Mizoram budget an ruahman dan enin, hmasawn chi a ni lo niin a sawi a, "Kum 2014-15 budget vbc. 6707 zinga 45.78% chu sorkar inrêlbawlnaah a kal a, 43.70% chu hlawhah a kal a, 10.98% chauh mipui chan a ni," a ti.

ZNP President chuan, sum harsatna vanga Treasury-te ni khata sum pek chhuah tur zat bithliah a nih avangin bill táng a tam hle niin a sawi a, "Kan la hriat ngai loh ruling pa mangang mahni bill zuar an tei sup sup ta mai a ni," a ti a, sorkarna an chan chuan sum pek chhuah theih zat bituk awm loa Treasury an kal theih tur thu a sawi.

Zawhna chhangin Duhoma chuan, ZNP sorkar se chuan sorkar sum harsatna chinfel nan leh sum renchem nan nasa taka hma an lak tur thu leh ruahmannate pawh an neih vek tawh thu a sawi a, "Sum harsatna hi a thûk tawh lutuk a, chinfel nghal mai theih a ni lo. Sorkar ila chuan kum nga chhungin kan chingfel vek thei ang," a ti.