KHAWTHLIR

V/C inthlan result
Saiha district-a July 20, 2015-a khaw palia village council bye-election result chu tihchhuah vek tawh a ni. Siata II-ah seat awm zawng zawng INC-in an la a; seat pali awmna Maisa-ah MDF leh Independent-in seat pahnih ve ve lain, Chhaolo II-a seat khat awm chu Congress-in an la. Ahmypi-a seat khat chu MNF-in an la thung.

Survey dan tur zir
Employment-Unemployment Survey neih tur atan nimin khan Aizawl IPR conference hall-ah training buatsaih a ni a, Labour Bureau-a director general Dr Mathisakaran chuan survey nei turte thil pawimawh hrang hrang a zirtir.

Mei zu man
Aizawl District Anti Tobacco Squad chuan, nimin khan New Market leh a chhehvelah squad drive an nei a, phal lohna hmuna mei zu mi 26 manin, pawisa an chawitir. Food Safety Standard Act phal loha thil zuar mi pariat hnen aṭangin Shikhar báwm 355 leh health warning awm lo meizial báwm 12 an man bawk.

Park enfiah
Parliamentary secretary (LAD) K Lalrinthanga chuan, nimin khan Thingdawla Kolasib District Park a tlawh. K Lalrinthanga chuan, Kolasib DLAO chu District Park-ah a tam thei ang ber thing leh mau phun turin a hrilh.

MJA Library pe
MJA Public Library-a dah turin Lalrokhawma'n a lehkhabu ziah, 'Ka tum ka hlen ta' tih bu hnih, LH Hauheng-in a lehkhabu ziah, 'Zing pangpar' tih bu hnih an pe a; an chungah MJA-in lawmthu a sawi.

Thangmawia sûn
Congress party ṭhalaite leh National Trade Union of Mizoram chuan thuchhuah siamin, July 20, 2015-a thi ZORO president R Thangmawia chu an ui thu leh an sûn thu an tarlang a; khawvel hmun hrang hranga Mizo hnam peng hrang hrangte insuihkhawmna tura a hnathawhte chu Mizote'n an hriat reng tawh tur thu an sawi.