Bank account hralh thuah fimkhur turin ngen

Mizoram police chuan thu­chhuah siamin, tun hnai kum 4/5 vel aṭangin bank account mi dang hnena hralh ṭhin an awm niin an tarlang. Bank account hralh hmanga buma awm mi tam tak tuartu an awm tawh nia sawiin, fimkhur turin mipui an ngen.

Police thuchhuah chuan, bank account hralh ṭhinte chu mi bum chíng an nih thu tarlangin, "Mi tam tak bumin, bank account/ATM card hmang hian sum an laksak ṭhin. Bank account hmanga mi bumtute hian hamṭhatna chi hrang hrang - hna hmuhsakte, thilpek te, contract-te leh vanneihna chi hrang hrang an tawktarh a; heng atan hian processing fee, tax leh transportation charge-te an dil ṭhin," a ti.

Police tarlan danin, bank account hralhte chu misualte'n in­phên­na atan an hmang a, an nihna dik tak hriat mai theih a ni ṭhin lo. Mi mâwlmang zawk leh rethei tê tê hnen aṭanga bank account/ATM card leikhawm a, to deuh zawka hralh leh ṭhin mi ṭhenkhat an awm bawk. Heng avang hian police-te chuan mipui hriat tur an tarlang a ni.