MPC hotute leh Larsap an inkâwm

MPC party hruaitute chuan an president Lal-hmangaiha Sailo hoin nimin khan Raj Bhavan-ah Governor Lt.Gen. Nirbhay Sharma an kâwm a; memorandum an thehlut nghal.

Memorandum-ah hian 14th Finance Commission rawtna anga Mizoram special category state a nihna tihtawp vanga Mizoram mipuite'n harsatna nasa tak an tawh theih thu ziakin, Mizoram chu special category state-a a awm zui theih nana hma lakpui turin an ngen a ni.

Lalhmangaiha Sailo chuan, "Mizoram special category state kan nihna hi laksak chi kan ni lo a, a chhan chu Memorandum of Settlement-ah chiang takin special category state kan nihna ziah lan a ni. Central sorkar hian special category state kan nihna min hlihsak chuan inremna thuthlung a bawhchhia a ni ang," a ti.

Memorandum-ah chuan kawlphetha chung­chang an ziak bawk a; Mizoramah kawlphetha megawatt 4,500 siam chhuah theih a nih laiin, kum 30 state a nih hnuah pawh hmalakna lian tham a la awm lo tih an tarlang. Mizoram sorkarin kum 2009-2013 chhunga hydel project siamna tura agency pathumte MoU a ziahpuite'n kum nga chhungin hmalakna an nei lo tih sawiin, sorkar kal mekin action la tura MoU awmze nei an ziahpui theih nan hma la turin Larsap an ngen a ni.