Mi pasarihte anticipatory bail dilna Aizawl District Court-in a hnawl

Lai Autonomous District Council (LADC) hnuaia thawktu lak dan leh sum tichingpena puh an nih vanga mi pasarihin anticipatory bail an dilna chu Aizawl District & Session judge Lucy Lalrinthari'n a hnâwl.

Mi pasarihte'n anticipatory bail an dilna hi July 20-21, 2015 khan ngaihtuah a ni a; sorkar ukil, thubuai neitute ukil leh case investigating officer (IO)-te thusawi a ngaithlak hnuah nimin khan thutlukna siam a ni. Bail diltu zinga pakhat Laldun Chinzah chuan Dr JC Lalremruata siamsak medical certifcate a nei a ni.

Sorkar ukil H Lalmuankima chuan, thubuai neite chu LADC-a hna sang tak tak thawk an nih avangin zalen taka an awm chuan finfiahna thil pawimawh an tihchingpen theih thu a sawi a, "Complaint thehluttu pawh an vehthlêm avangin FIR hnuhkîr hial a duh phah a, jail-ah táng phawt se a chhuitu tan a awlsam ang," a ti.

Case IO pawhin he thubuaiah hian thu zawhfiah tur tam tak a la nei tih a sawi a, zalen taka an awm chuan finfiahna tur thil pawimawhte an tihchhiat theih thu Court a hrilh bawk.

Sorkar ukilin inquiry report a thehluh aṭanga a lan danin, hriat theih chinah pasarihte hi Rs. 1,56,37,220 tichingpena puh an ni a, sumte chu khatih laia LADC executive member (Education) leh tuna chief executive member V Zirsanga, headmaster NC Muankima, zirtiru attached-a DEO office-a thawk Ramengzauva, zirtirtu C Lalchawiliana leh DEO Lalduna Chinzah ten an insem ni awmin inquiry report-ah tarlan a ni.

Thubuaia hming lang dang pahnih - education officer H Lalruatkima leh assistant art & culture officer B Vanlalngheta te pawh ACB chuan ringhlelhin an chhui zui mek a ni.

Nimin tlai khan Vanglaini palai zawhna chhangin ACB SP John Zothansanga chuan, "Court order hi kan la hmu lo a, kan hmuh hunah heng mite hi man an nih dawn leh dawn loh kan ngaihtuah ang," a ti.