JJB thubuai khawih a tlahniam zel

Juvenile Justice Board (JJB) chuan sorkar kum liam ta, 2014-15 chhung khan naupang thubuai an neih 332 zinga 265 an chingfel a, kum hmasa, 2013-14 chhunga an chinfel zat 304 aiin 39-in a tlem zawk. JJB case hi tun hnai kum thum chhungin a tlahniam tial tial a ni.

Mizoram State Child Protection Society (MSCPS) chhin­chhiah danin, JJB hian April 2014 - March 2015 chhung khan naupang pawi khawih thubuai thar 290 neiin, chungte chu mipa 271 leh hmeichhia 19 an ni a; kum 2013-14 chhunga case chinfel hman loh an la neih nen case 332 (mipa 313 leh hmeichhia 19) an nei. Case 332 zinga 265 chingfelin, chungte chu mipa 253 leh hmeichhia 12 an ni.

JJB case khawih zat hi tun hnai kum thum chhungin tlem chho zel. Kum 2014-15 chhungin case 332 an neih laiin, 2013-14 chhungin case 346 an nei a, kum 2012-13 ah phei chuan case 423 an nei.

Kum 2013-14 chhunga an case neih hi mipa 328 leh hmeichhia 18 an ni a, 2012-13 chhunga case-te chu mipa 396 leh hmeichhia 27 an ni.

Kum 2013-14 chhungin case 346 zinga 304 (mipa 286 leh hmeichhia 18) an chingfel hman. Kum 2012-13 chhungin case an neih 423 zinga 331 (mipa 311 leh hmei­chhia 20) an chingfel.

Kum 2014-15 chhunga JJB-in naupang thubuai a dawn thar zinga a tam ber chu mi thil rûksak thubuai a ni a, thil ruk thubuaiah hian mipa 145 leh hmeichhia pasarih hming a lang. Pawngsual thubuai a awm nual bawk.

Case chinfel zinga naupang 47 chu an chhungte hnenah hlan an ni a, naupang 83 chu zilh an nih hnuah hawtir an ni. Counselling neihpui tura thawn 15, community service ti tura tih mi 10, pawisa chawi tura tih pa­hnih, nungchang ṭhat zui vanga chhuahtir 36, hmun him zawka thawn pakhat, special home-a dah 48, observation home-a dah pathum an awm.