Nau pài hriat lâwk khapna dan thlirho

Nau pài nihna enfiah khapna dan, Pre-Conception and Pre-Natal Diagnostic Techniques (PC&PNDT) Act, 1994 chungchanga sorkar hmalakna thlirin nimin khan State Advisory Board chu CMO conference hall-ah an ṭhukhawm a; Health minister Lal Thanzara'n a kaihruai.

Health Minister chuan, naupai nihna hriat lâwk tum chu India ram hmun dangte angin Mizoramah harsatna tling ve lo mah se, India ram puma zawm ngei ngei tura tih a nih avangin ṭha taka kalpui a ṭul thu a sawi a, "Danin tih tur leh tih loh tur a tihte awmze nei taka zawm a ṭul. Central Inspection & Monitoring Team-in Mizoram din­hmun a enfiah hunah pawh hmalakna chhuanawm tak entir tur kan neih theihna atan theihtawp i chhuah ang u," a ti.

Meeting-ah hian State Commission for Women chairperson Vanlalawmpuii Chawngthu, Health secretary Lalhming­thanga, Social Welfare secretary Lalrinliana, Law & Judicial secretary R Thanga leh MHIP vice president Dr Thanpuii te an tel.

PC&PNDT Act hnuai­ah October, 2014 thleng khan India ram pumah thubuai 607 ziah luh a ni tawh a, thiam loh chantir mi 90 an awm. Thubuai avang hian doctor 64 chu an medical licence tihtawpsak tawh a ni.