Covid-19: Mizoram dinhmun Hripui vei mi 49 hmuh belh

October 28, Nilaini khan Mizoramah Covid-19 vei mi 49 hmuh chhuah a ni. Nimin khan hripui laka fihlîm tawh mi 20 chhuahtir an ni a; hripui vei hmuh tawh mi 2,656 zinga 2,258 (85.01%) an chhuak tawh.

Covid-19 positive Nilainia hmuh chhuahte chu mipa 28 leh hmei­chhia 21 an ni a; ZMC laboratory-a hmuh chhuah mi 36, TrueNAT-PCR hmanga Lunglei leh Serchhipa hmuh mi pakhat ve ve, Rapid Antigen Test (RAT) hmanga Aizawla hmuh mi pasarih leh Lawngtlaia hmuh mi pali an ni.

SRH-ZMC Bulletin tarlan danin, hripui laka fihlim tawh nimin khan mi 20 chhuahtir an ni a; SRH-ZMC aṭangin hmeichhe pakhat, Beraw­tlang CCC aṭangin 12, BSUP CCC aṭangin pali, Chhiahtlang CCC aṭangin pahnih leh Kolasib SIRD aṭangin pakhat an ni.

Mizoramah Covid-19 positive mi 2,656 hmuh chhuah tawh a ni a, mipa 2,072 leh hmeichhia 584 an ni. An zinga mi 2,258 (85.01%) chu chhuahtir an ni tawh a, mi pakhat thi tawhin, enkawl mek mi 397 (14.95%) an awm.

October 28-ah district hmun hrang hrangah mi 1,665-te swab sample endik a ni a; ZMC laboratory-ah RT-PCR hmangin sample 811, district pariatah TrueNAT-PCR hmangin sample 123 leh RAT hmangin district pakuaah sample 731 endik a ni.

October 28-a ZMC laboratory-a Covid-19 vei hmuh chhuah mi 36-te chu mipa 21 leh hmeichhia 15 an ni a, Aizawla veng 10-a mi an ni. Mi 33 chu Mizoram chhunga kái (local positive contact) an ni a, pathum chu state pawn aṭanga rawn haw a ni thung.

Covid-19 positive hmuh thar zinga Zemabawka mipa kum 26 mi chu Assam Regiment sipai, chawlh hmanga Jammu & Kashmir aṭanga rawn haw a ni a; quarantine facility-a awm lai niin, Covid-19 symptom a nei lo. Tripura aṭanga rawn haw Zemabawk Galilee venga hmeichhia kum 12&44 nufa, inkhung hrang mek hmuh chhuah a ni bawk.

Mizoram chhunga kái - Ramthar Veng mi 14, Zemabawk North mi 7, Edenthar Veng mi 2, Zarkawt mi 4, Ramthar North mi 3 leh, Chawlhhmun, Chhinga Veng leh Laipuitlang mi 1 ṭheuhte dinhmun chu hmun dangah chiang zawka tarlan a ni.

TrueNAT-PCR hmangin Lunglei Civil Hospital-ah hmeichhia kum 16, Lunglei Venglai mi hmuh chhuah a ni a, Mizoram chhunga kái chhâwng niin, symptom a nei lo.

Serchhip District Hospital-ah Assam lam mi mipa kum 18 hmuh chhuah a ni a, Prem Kram company-a thawk, tun hnaia Mizorama rawn lut, quarantine centre-a awm lai, symptom nei lo a ni.

RAT hmangin Aizawlah hripui vei mipa pahnih leh hmeichhia panga hmuh a ni a, veng pasariha mite an ni. An zinga pakhat, Zemabawka hmeichhia kum 33 chu Kolkata aṭanga rawn haw hlim, Lengpui Airport-a endikna aṭanga hmuh chhuah a ni a, symptom a nei lo.

Aizawla RAT hmanga Covid-19 positive hmuh dang - Bethlehem Veng, Chanmari West, Dinthar, Electric Veng, Zemabawk Vengthar leh Zuangtuia mite chu Mizorama kâi chhâwng an ni a; kimchang zawkin hmun dangah tarlan a ni.

RAT hmang vêkin Lawngtlaiah hripui vei mi pali, mipa vek - Lawngtlai Vengpui, Sangau-II, Chawngte-P leh Longpuighat khaw mite hmuh chhuah a ni a, pathum chu sikul naupang niin, pakhat chu kum 83 mi a ni thung.