Discharge protocol siam rem tum a ni

Health minister Dr R Lalthangliana hoa nimina Secretariat Conference Hall-a sorkar hotute ṭhukhawm chuan, Covid-19 vei enkawl, an vei tawh loa ngaih hnua chhuahtir dan (discharge protocol) leh high risk positive contact inkaihhruaina leh kalphung hman mekte siam rem a, a rang lama hman an rêl.

Ṭhutkhawmah hian covid care centre (CCC), Covid-19 vei enkawlna aṭanga inchhuahtir dan leh high risk primary contact chungchangte an sawiho. Aizawla CCC dinhmun thlirhoin, tun dinhmunah inenkawlna hmunhmaah thlaphânna tur awm rih lo mah se, CCC neih belh zel ṭha an tih thu an sawi.

Covid-19 Medical Operational Team-in discharge protocol leh high risk positive contact inkaihhruaina leh kalphung hman mek chungchanga rawtna an siam, inkhung hran hun pawhsei an rawtna chu sawiho a ni a; chu'ngte chu ennawna siam rem hret ṭha an ti a, a rang lama tihfel an rêl a ni.

Health minister Dr R Lalthangliana chuan, Covid-19 vei an pun zel avangin ruahmanna kalpui mek leh kalphung neih sate ennawn a, thlir lêt a ṭul thu a sawi a, "A ṭha ber kan duh avangin ngaihtuahna thar kan sên reng a ngai a, kan boruak tawn zel angin ruahmannate her rem leh siamṭhat a ṭul ṭhin," a ti.

Dr R Lalthangliana chuan, hripui vei hmuh thar zingah naupang an tam avangin a bika naupangte enkawlna tur child friendly CCC ruahman chu ngaih pawimawh a nih thu sawiin, "BSUP complex, Durtlang chu naupang bik awmna tur CCC atan hman mek a ni," a ti a; Social Welfare department nen inráwnin, ITI Venga Bal Bhawan quarantine centre pawh naupang pual CCC atan hman tum a nih thu a sawi.

Nimina ṭhutkhawmah hian Covid-19 Medical Operational Team chairman Dr ZR Thiamsanga, MLA, chief secretary Lalnunmawia Chuaungo, Health secretary H Lalengmawia, DMR secretary Lalbiaksangi, a kaihhnawih department hotu te, IMA Mizoram Chapter leh Non-Government Hospital Association aiawhte an tel a ni.