Thla 3 vel eikhawp buhfai a awm Oil leh gas lak luhna dang dap mek

Food, Civil Supplies & Consumer Affairs (FCSCA) minister K Lalrinliana chuan, tun dinhmunah Mizoramah buhfai thla thum ei vel a awm mek thu a sawi a, "Hmun dang aṭanga oil leh gas lâk luh dan dap mek a ni," a ti.

Vanglaini palai zawhna chhangin K Lalrinliana chuan, oil leh gas chu a dah khâwlna Mizoramah a awm ṭhat loh avangin tam tak chhêk khâwl theih a nih loh thu a sawi a, "Vairengte leh Bairabi lamah a dah khawlna hmun tur ngaihtuah mek a ni a, duh angin thil a kal chak thei lo. A hmun tur chinfel chhung pawhin hun a duh rei," a ti a; tuialhthei chu a dahkhawlna awmchhun petrol pump-ah a khah vekin thla 5 vel daih a nih theih thu a sawi.

FCSCA Minister chuan, IOC-in gas leh petrol Mizorama phur lut tura kawng an pawm awm chhun chu Guwahati-Silchar, Silchar-Mizoram a nih rih thu a sawi a, "Tunah hian Manipur leh Agartala lam aṭanga la lut turin hmalak mek a ni. Agartala lam aṭanga la lut tur chuan Kanhmun lei tihchak bakah lei pakhat enfiah a ngai. PWD lamin hma an la tawh," a ti.

Minister K Lalrinliana chuan, Rél hmanga oil leh gas phurh luh dan tur ngaihtuah mek a nih thu sawiin, "Gas hi chu phurh luh theih mai kan inbeisei deuh a, oil erawh security thilah a harsat deuh a rinawm," a ti a; oil leh gas-a harsatna a awm lohna turin theihtawp an chhuah thu a sawi.

K Lalrinliana chuan, ramin harsatna a tawh laiin ṭanho a ṭul thu sawiin, "Mipui pawhin chhûn lamah chuan electric hmang nasa se, zan lamah erawh gas hmang thei se a duhawm hle. Ramin harsatna a tawh chuan kan nunphung a lo hrehawm deuh a nih pawhin, ram leh hnam tan kan tawrh ve ngam hi kan tih turah ka ngai," a ti.

Buhfaiah harsatna a awm a rin loh thu sawiin FCSCA Minister chuan, "Tunah hian thla thum ei vel kan nei a, harsatna a awm loh kan beisei," a ti a; buhfai chu rêl hmanga lak luh theih a nih avangin a rawn thlen belh zel theih tur thu a sawi a ni.