Thu dik sawi turin CM leh MNYF phût

Congress party ṭhalaite chuan, chief minister Zoramthanga'n ZMC-ah ICU khum 17 vel a awm thu October 25, 2020-a sawi tûk lawkah MNF ṭhalaite'n press release hmangin ZMC-ah ICU khum 14 a awm thu an tarlang tih an sawi a; thu dik zawk puangzar turin CM leh MNYF an phût.

MPYCC thuchhuah chuan, MPYCC leh ZPM ṭhalaite'n Covid-19 veite enkawlna ICU leh ventilator tam zawk dah turin sorkar an phût ve ve tih tarlangin, "MNF ṭhalaiin thuchhuah siama Covid-19 atana siam leh sorkar siam ni lo Mizorama ICU leh ventilator zawng zawng zat an rawn puangzar ve ringawt hi thil zahthlak leh dâwt hmanga mipui bum tumna a ni," an ti.

Congress ṭhalaite chuan, Mizoram damdawi-ina ICU khum 82 awm mek zinga 28 chauh sorkar ta a ni tih sawiin, "Sorkar hian Covid-19 atana ICU hman theih zat dik tak a puanzar vat kan ngiat," an ti a; Covid-19 veite enkawlna hmun bik Covid-19 dedicated hospital leh CCC-ahte ICU leh ventilator bun belh turin sorkar an phût a ni.

MPYCC chuan, State Referral Hospital leh ZMC chu Congress sorkar din a nih thu an tarlang a, "MNF kum 10 sorkar (1998-2008) khan an ching chhe vek a, ar vulh nante hman niin, IR-te an dah a, Congress sorkar (2009-2018) khan tungding ṭha lehin, medical college thlengin a din chho ta a ni," an ti.