KHAWTHLIR

Vawiinah CADC-ah VC thlang dawn

Chakma Autonomous District Council (CADC) huam chhungah vawiin hian village council inthlanpui neih a ni dawn. CADC-a VC inthlanah hian tukin zing dar 7 aṭanga tlai dar 4 thleng vote thlak hun hawn a ni dawn a, vote thlak zawhah vote tlate chhiar tur a ni. CADC huam chhungah hian VC 88 awmin, voter 37,883 an awm a, mipa 19,162 leh hmeichhia 18,721 an ni.

Lokayukta-ah thubuai 71 lut

Vigilance changtu chief minister Lalduhoma chuan MNF member Robert Romawia Royte zawhna chhangin, Mizoram Lokayukta hnuaiah thubuai 71 a luh tawh thu House a hrilh a, "Central Bureau of Investigation chhuitir mek pahnih a awm," a ti.

Hmeichhe lam dan zirho a ni

Mizoram State Commis-sion for Women leh Child Development Project Officer, Lawngtlai bultumin nimin khan LADC Hall-ah 'Laws related to Women & Health and Nutrition' tih thupui hmangin legal awareness buatsaih a ni a, MSCW member Vanlalhlupuii Fanai-in a hmanpui. Zirhonaah hian advocate & legal consultant St. Ramhmachhuanmawia'n dan hnuaia hmeichhiate dikna chanvote a sawifiah a ni.

Siahaah dan zirho

Siaha District Child Protection Unit leh Sponsorship and Foster Care Approval Committee chuan nimin khan Siahaa DRDO conference hall-ah 'Sponsorship Beneficiaries Children and Parents’ tih hmagin zirhona an buatsaih a, district bawrhsap VL Hruaizela Khiangte-in a hmanpui.

MZERC State Advisory Committee ṭhukhawm

Mizoram Electricity Regulatory Commission (MZERC) huaihawtin nimin khan Aijal Club-ah Mizoram State Advisory Committee meeting vawi 27-na neih a ni a, MZERC chairman Benjamin L Tlumtea'n a kaihruai. Ṭhutkhawmah hian kum 2025-26 atana electric bill man bithliah dan tur Power & Electricity department rawtna MZERC-a thlen chungchang te, kawlphetha ṭha zawk neih theih dan tur te, power sector corporation-a dah tura hmalak tawh dante sawiho a ni.