ZORO-in Zo fate inpumkhatna tichhe thei zawnga thu thehdarh pawi an ti

Zo Re-Unification Organisation (ZORO) chuan thuchhuah siamin, Zo fate'n inpumkhatna kawng an zawh mek laia inpumkhatna kawng dâl thei zawng leh inunauna tichhe zawnga tun hnaia social media lama thusawi/thuchhuah awm ṭhin chu pawi an tih thu an tarlang.

ZORO chuan, Zofate inpumkhatna kawng dâl thei zawnga social media-a thu thehdarh a ni ṭhin chu pawi an tih thu sawiin, "Kan hnam tan nghawng ṭha lo tak thlen chhunzawm thei thil a nih avangin fimkhur a, social media hmanga inbeih tawnna thuchhuah emaw, video emaw siam tawh lo turin mi tin kan ngen. Khawvel hmun hrang hranga Zo fate kan inpumkhata kan insuihkawm lehna turin hma kan la zel dawn a ni," an ti.

ZORO chu khawvel ram hrang hranga Zo fate an insuihkhawm a, rorelna pakhat hnuaia an awm lehna tura hma la tura ding an nih angin an dinna ngaiah an la ding reng tih ZORO chuan an tarlang a; "India, Bangladesh leh Myanmar sorkar awpna hnuaia awm mek Zo fate hi rorelna pakhat hnuaia awm turin hma kan la zel ang," an tiin, Zo fate'n an dikna chanvo an hmuh hma chuah an beih zel dawn thu an tarlang.