Agriculture Minister-in Covid-19 vanga Hnual lo turin kuthnathawktute a chah

Agriculture minister C Lalrinsanga chuan, loneitute chu Covid-19 vanga a hnual záwnga awm lo turin a chah a, "Hna thawh loh duhna rilru put phah lo turin ka chah a ni," a ti.

Nimin khan Agriculture Minister hian a pisa aṭangin Saikhawthlir, Chuhvel leh Zawlnuam khuaa loneitute hnena alu chi sem tur quintal 425 a vailiam a; thu sawiin, "Covid-19 avanga kan ram leilung ngeia Mizo kan chán hi a lungchhiatthlak hle. Pathianin zah a ngai ang a, hripui hian reh hun a la nei ngei ang. Kut hnathawktute Covid-19 avanga hnathawh loh phahna atan hmang lo a, theihtawp chhuah zawk turin ka chah a ni," a ti a, intodelh turin theihtawp chhuah a ṭul thu a sawi.

C Lalrinsanga chuan, Mizorama thar ve theih reng state páwn aṭanga lak luh a ngai ṭhin chu a tlàwm thlak tih sawiin, "Kan intodelh loh avangin state dangin min vauna atan an hmang ṭhin. Economy-ah keimahnia kan insawh ngheh a ngai. Alu aṭangin bul kan ṭan dawn a ni," a ti.

Agriculture Minister chuan, intodelh theihna turin Chief Minister-in ṭhahnem a ngaih thu sawiin, sorkar hna chu hlawh lâkna atan ringawt hmang lo a, ram leh hnam tana theihtawp chhuah turin department official-te a chah.

Agrictulture depart-ment hian FOCUS kaltlangin Bihar aṭangin alu chi qtl. 425 an chah lut a, loneitute hnenah a thlàwnin an sem a ni.