Champhai Bawrhsap leh MJA inkâwm

Champhai district bawrhsap Mohammad Aaquib leh Mizoram Journalist Association (MJA), Champhai district member-te chu nimin khan DC pisaah an inkâwm a; March 26, 2025-a Champhaiin MJA Conference vawi 51-na a thlen tur chungchang leh thil pawimawh dangte an sawiho.

Mohammad Aaquib chuan, thuthar lakhawmtute chu democracy innghahna lungphûm pawimawh tak an nih thu sawiin, theihtawp chhuah zel turin MJA member-te a chah a, "Sawisel ngai nia in hriatte sawiselin, rawtna leh thurawn in neihte rawn thlen zel ang che u. In thurawnte dawngsawng turin ka inpeih reng a ni," a ti.

Inkawmnaah hian Champhai District MJA president Lalhlupuia hoin MJA member-te an tel a; Mizoram pum huap MJA General Conference vawi 51-na, March 26-a Champhaiin a thlen tur chungchang te, khawpui faina chungchang te, khaw chhung kawngpui venghim tura Road Protection Squad tharthawh leh chungchang bakah, thil pawimawh hrang hrangte an sawiho a ni.