LC leh VC tharte tan training buatsaih

Lunglei leh Saitualah nimin khan local council leh village council member-te pualin training buatsaih a ni a, thupui hrang hrang hmangin mithiamte'n thil pawimawhte an zirtir.

Lungleiah chuan Lunglei Municipal Council (LMC) chief executive officer (CEO) Donny Lalruatsanga kaihhruaiin LMC hnuaia LC member-te tan Lunglei Convention Centre-ah training buatsaih a ni a, LMC chairman Lalzuithanga'n a hawng.

Training-ah hian Donny Lalruatsanga, LMC executive councillor Zorinsanga Hmar leh Lalhruaitluangi Sailo leh, FAO Lalmawizuala ten parking fee/parking regulation, property tax/urban local body grant, licensing regulations/hoardings regulations, LC tih tur leh mawhphurhna, urban local body sum hmuhna leh sum enkawl dante an sawifiah a; zawhna leh chhanna bakah sawihona hun hman a ni.

Saitualah chuan DC conference hall-ah election officer Lalṭhakima Chhangte kaihhruaiin VC member tharte tan orientation training buatsaih a ni a, bawrhsap Dr Lalngura Tlau-in a hmanpui. Training-ah hian sorkar department hrang hrang hotute'n VC member-te chu sorkar laipui scheme-te an hrilhfiah a ni.