Kolasib - Kawnpui kawng siam endiktute'n ṭha thawkhatah ngai

Kolasib District National Highway Monitoring Team chuan nimin khan Balaji Construction-in Kolasib leh Kawnpui inkar NH kawngpui thawm ṭhat leh blacktop hna an thawh mekte an endik a; contractor-te thawh chin leh hmanrua an hmante ṭha thawkhatah an ngai.

Sorkar thuchhuah tarlan danin, Monitoring Team hian Thingdawl khaw chhunga kawngpui siam mekah complaint an nei a, contractor-te chuan tih ṭhat nghal an tum thu an sawi.

Monitoring Team hian contractor-te hnathawh mek chu a ṭha thawkhat nia an hmuh thu leh, an khawl leh hmanraw dangte pawh a lungawithlaka an hriat thu an sawi a; chutih rualin, kawng ṭha leh tlo siam ngei tura an chah bakah, an intiamna anga March 2025 chhunga an huam chin zo tur leh fûr hma ngeia zo hman turin an chah a ni.

Kolasib District NH Monitoring Team hi Kolasib DC kaihhruaina hnuaia din a ni a; nimina kawng endiknaah hian Kawnpuia SDO (Civil) Dr Dorris Lalrinawmi leh SDO (PWD) Thanpuia, Kolasib Sub-Hqrs YMA vice president C Liankunga leh finance secretary Samuel Lalfela, JAC general secretary F Lalbiakliana leh KDTOA president C Thanhlira te an tel.