Harsatna tâwk zirlai ṭanpui turin phût

Students' Self-Support Union (SSU) Gen.Hqrs chuan, sikul kài chungchang sorkarin a kalpui dan fuh loh vanga zirlai tam takin Covid-19 an vei chu pawi an tih thu an sawi a; hripui kâi avang leh zirlai, inkhârkhip vanga harsatna tâwkte chu ṭanpui turin Mizoram sorkar an phût.

SSU Gen.Hqrs chuan, Covid-19 vei zirlaite leh inkhàrkhip vanga harsatna tâwk zirlai tam tak an awm avangin chhawmdàwlna kawngah hmalak an tum thu an puang a; "School Education department-in September 21, 2020-a order a chhuah avanga zirna-in kâi a ni leh zirlai tam takin hri an kái hi pawi kan ti hle," an ti a; hri vei zirlaite chu an inenkawlna senso ṭanpuina pe turin sorkar an ngen a, sorkarin hma a lak loh chuan SSU-in hma an lâk dawn thu an tarlang.

Sorkar chu zirlaite himna leh hriselna ngun taka ngaihtuah tura chahin SSU chuan, "Zirlaite hi sum tuakna an ni lo tih hria a, tute emaw nawrna vang mai maia thutlukna siam lo turin kan duh. Kal dan mumal nei tur te, sikul kâi chungchangah a duh kal, a duh lo kal loh tih ang hnì hnêa kal lo turin kan ngen. Thutlukna mumal tak sorkarin a neih loh vanga zirlaite leh an chhungte dinhmun hlauhawm taka an ding hi pawi kan ti tak zet a ni," an ti.

SSU chuan, inkhàrkhip kal mek chhunga zirlai, thingtlang aṭanga Aizawla lehkha zir, tangkhangte mangang lo turin an chah a, "Harsatna kan neihna apiangah SSU chuan puih kan inring reng a ni," tiin, harsatna neite chu SSU Gen.Hqrs hruaitute hnena inhriattir turin an chah a ni.