Mizo driver-te chhan turin sorkar phût

ZPM Ṭhalai chuan thuchhuah siamin, Cachar DC chu hrem ni se an duh thu an tarlang a, Assam-a Mizo truck driver tangkhangte chhan turin Mizoram sorkar an phût.

ZPM ṭhalaite tarlan danin, October 28, 2020 khan Cachar DC Keerthi Jalli chu Saihapui V-ah kalin, Mizo IR-te lâk chhuah an nih loh chuan Mizoram kawng dan a nih dawn thu a sawi a; chawhnu dar 1 vela Saihapui aṭangin an haw hnu lawkah Lailapur leh Hailakandi aṭanga Mizorama lut tur lirthei an dang ṭan a ni.

October 9, 2020-ah Hailakandi DC Anbamuthan hoin Assam sorkar mite'n Mizo pa thlám leh huan thlai tam tak an tichhia a, sorkar laipui flagship programme MGNREGA bungrua an tichhe bawk.

Cachar DC-in kawngpui dan chah hmanga Mizoram mipui a vau chu intham loh thlak an tih thu leh a ṭawiawmtu Assam Addl. DG (Law & Order) GP Singh lakah pawh an lawm loh thu sawiin ZPM ṭhalaite chuan, "Constitution pawh zah zo lo IAS/IPS officer an lo chhuak hi pawi kan ti tak zet. Rukrû ang maia dawihzep taka che tawh lo turin kan hriattir a, an chunga hremna na tak lek turin thuneitute kan phût," an ti.

ZPM Ṭhalai chuan, Assam sorkar official-te'n Mizoram mipuite tham lo taka an tih fo chhan chu Mizoram Chief Minister leh Home Minister an hriat chian vâng nia an hriat thu an sawi a, "Kan CM leh HM vàng hian min 'nuthûri zuam' ni berin kan hria a, a thangtlàwm thlàk hle," an ti a; Mizoram sorkar chu Mizo truck driver tangkhangte chhan turin an phût a ni.