UPSC result-a Mizo hming a lang lo hi Mizo ṭhalaite tan chona a ni: CM Hawla

Chief minister Lal Thanhawla chuan, Mizorama civil service coaching centre awmte'n hmun danga coaching centre-te an phak loh thu leh, UPSC civil service examination result hnuhnung bera Mizo hming a lang lo chu Mizo ṭhalaite tan chona a nih thu a sawi.

Hrangbana College-in nimina Vanapa Hall-a Coral Jubilee lawmna leh Fresher' Social an hmanna a hmanpuinaah thu sawiin Chief Minister chuan, "UPSC result-a Mizo hming a lang ve lo hi ṭhalaite'n chonaah ngai se a duhawm hle. India rama civil service coaching centre ṭha tak takte hi an hmunpui chhuahsan duh lo an nih avangin Mizorama kan hmuhte hi chutiang centre phâk lote an ni ṭhin a, a pawi hle a ni," a ti.

Vanglaini thu dawn danin, UPSC CSE 2014-ah hian interview-ah Mizo pakhat a inlan a, mahse a tling zo lo. Hmarchhak state dang aṭang erawh chuan tling an awm deuh vek a; Assam aṭangin mi 13, Manipur aṭangin mi panga, Nagaland aṭangin mi pali, Arunachal Pradesh, Meghalaya leh Tripura aṭangin mi pakhat ṭheuh an tling nia thu dawn a ni.

Lal Thanhawla chuan ṭhalaite tana khawvel thar siam chu sorkar tum ber a nih thu sawiin, "Mizoram mipui 50%-te hi ṭhalai an ni. Eizawnna nghet an neihna theihna turin chhawr tlaka siam hi sorkarin a tum a, tunah hian Mizoram Youth Commission-in hna hrang hrangah training a siamsak a, ṭhalai tam tak chu hna hmuhsakin ram pawnahte an thawn chhuak mek a ni," a ti a; UNO pawhin skill development a ngaih pawimawh thu a sawi.

Discipline vawnna atan National Cadet Crops (NCC) zawm pawimawh a tih thu sawiin Chief Minister chuan, "NCC hotu lianten Mizoramah NCC academy din an tum a, air wing phei chu hmarchhaka hmunpui ni tura siam an tum a ni a, an headquarters atan Tuirial Airfield chu hman a ni ang," a ti.

Chief Minister hian HBC Students’ Union buatsaih magazine bakah zirlai Lalrinngheta Renthlei lehkhabu ziah, ‘Ka suangtuahna khawvel’ tihte a tlangzarh nghal a ni.

Hrangbana College principal Lalrinawma sawi danin, an college-a kum 2015-16 chhunga zirlai awm chu 1,799 an ni a, B.A bikah hian zirlai 1,449 an awm.