KHAWTHLIR

Covid-19 vei mek State Referral Hospital (ZMC) ICU-a enkawl pakhatin an pung a, panga an awm mek. SRH-ZMC Bulletin tarlan danin, SRH ICU-a enkawl mek mi panga zinga pathum chu ventilator hmantir an ni a, pahnih chu oxygen pek an ni. SRH-ah hian nimin khan hripui vei mi pariat dah luh thar niin, mi 61 an awm mek a; Isolation ward-a awm mi 56-te zingah ngaihtuahawm an awm lo.

MNF party chuan thuchhuah siamin, Covid-19 vanga Lalsangkhuma (62), Dawrpui a thi chu pawi an tih thu leh a chhungte an tawrhpui thu an tarlang. Hripui donaa medical lama thawk te, dan leh thupek kengkawhtu te, task force-te leh kohhrante chungah lawmthu an sawi tih an sawi bawk.

Lawngtlai DC chuan Nilaini khan thupek chhuahin, Lawngtlai Vengpui leh Vengpui-II VC huam chhungah vantlangah Covid-19 vei hmuh belh zel a nih avangin, Chief Medical Officer rawtna angin Vengpui leh Vengpui-II huam chhung chu containment zone-ah puan a nih thu a tarlang.

Kumin kum tàwp lama Lai Autonomous District Council (LADC)-a inthlanpui neih tura hman tur final electoral roll chu nimin khan Lawngtlai district election officer Dr Andrew H Vanlaldika, bawrhsap chuan DC conference hall-ah a tlangzarh. E.Roll tharah hian voter 51,542 an awm a, mipa 25,396 leh hmeichhia 26146 an ni a; draft roll aiin voter 260-in an tlem zawk a ni.

All Mizoram Women's Federation chuan thuchhuah siamin, October 26 zana Sakawrdaia doctor JH Vanlalnunmawia'n hmeichhia pawisawi lo pawngsual a tum chu an dem thu an tarlang a, "Thil sual titu hian a phu tawk hremna a hmuh ngei kan phût a, he thil thleng vanga harsatna tâwkte pawhin sorkar aṭangin chhawmdawlna an dawn ngei kan beisei," an ti.