KHAWTHLIR

Graduation Day
Champhai College chuan, nimin khan an multipurpose hall-ah Graduation Day cum Freshers Social an hmang a, parliamentary secretary (HTE) H Zothangliana'n a hmanpui. Champhai College aṭang hian kuminah zirlai degree course zo mi 92 an awm.

LAD meeting
Local Administration Department officer-te chu, nimin khan director A Biaklawma hoin an directorate conference hall-ah ṭhukhawm a, an department hmalakna leh hmachhawpte an sawiho.

Gutkha man
Aizawl District Anti Tobacco Squad te, Food & Drug Inspector-te leh Durtlang Leitan branch MHIP-te chuan nimin khan Durtlang huam chhungah special drive an nei a; FSSA leh COTPA Section 7 dan tlawhchhanin mi 39 hnen aṭangin Gutkha báwm 933 leh ram dang mei-zial báwm 973 an man.

Ruang chhar
Nimin zing dar 6 vel khan Saihatlangkawn veng chhunga Bualpui (NG) panna kawng chhakah M Suihu (31) thia chhar a ni. Thu dawn danin, M Suihu hi Saiha DRDA-a thawk a ni a, nimin vek khan Saiha District Hospital-ah postmortem a ni.

R Thangmawia ruang July 27-ah
ZORO president R Thangmawia ruang chu July 27, 2015-ah Aizawl a rawn thlen beisei a ni. Switzerland aṭanga an rawn thawn chhuah hun tur hriat theih ni lo mah se, Thawhṭanni-ah Aizawl thlenpui beisei niin a chhungte chuan an sawi. MPC, ZNP leh Zofa Global Network-te chuan ZORO president R Thangmawia thi chu pawi an tih thu leh an ui thu an chhuah. Nimin Vanglaini-a R Thangmawia, Zemabawk anga tarlan kha tihsual palh a ni a, Electric Veng, Aizawl a ni a, a pianna khua pawh Hmunṭha tih tur a ni. Tihsual palhah chhiartute hriatthiamna kan dil e.