Local council-te'n kawngpuia Lirthei riah khap an tum

Aizawl City Local Council Association (ACLCA)-te nimina Dawrpui School auditorium-a ṭhukhawm chuan, zan lama kawngpui dunga lirthei riah phal tawh loh ni se, an ti.

ACLCA meeting hi an president R Lal­chhuanawma'n a kaihruai a; zan lama kawng dunga riah ṭhin chu phal tawh loh an rel rualin, loh theih loh vanga riah ngai an awm chuan LC tinte'n anmahni huam chhung ṭheuhah ruahmanna fel tak siam mai turin thu an dah.

Local council-te chuan, khauh zawka ui khuahkhirhna turin ui chhiarpui neih an rel a; uite chu hri danna pek a nih leh nih lohte chhinchhiah a, a ṭul anga AMC-a thlen nise, an ti.

Veng chhung a thianghlim zawk theih nan bawlhlawh paih lirthei luh theih lohna hmunah pawh bawlhhlawh paih theih dan tur an rel a; zan lama bawlhlawh paih rawtna chu AMC hotute sawipui an tum.