Chakma-te STEE Category I-a seat Pek an nih loh nan MZP-in hma an la

Mizo Zirlai Pawl chuan, State technical Entrance Examination kaltlanga kumina course hrang hrang zir tur thlannaah Category-I ah Chakma zirlaite thun an nih lohna turin hma an la tih an puang.

MZP-te hi nimin khan Higher & Technical Education (HTE) department-a Technical Wing pisa kawtah Chakma zirlaite thun an nih lohna turin an duty a ni.

MZP hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkarin Chakma-te STEE-a ram leilung fate awmna, Category-I aṭanga paih an nih hnua Category-I ah a dah leh vanga hmalak an tum dante an sawi.

MZP president Lalhmachhuana chuan, Mizoram sorkarin Chakmate Category I-a a dah leh chu pawi an tih thu sawiin, "Ram leilung fate dinhmun luah thei tura chanvo an nei leh hi hriatthiam harsa kan ti a, STEE Category I-a Chakma awmte'n seat an chan loh nan hma kan la dawn a ni," a ti.

MZP President sawi danin, MZP-in STEE Category I-a an awm duh lohna nasa taka an lantir hnuah, September 25, 2014-a sorkar hotute nen inremna an siam angin March 24, 2015-ah sorkarin The Mizoram (Selection of Candidates for Higher Technical Course Sixth Amendment) Rules, 2015 a tichhuak a; chutah chuan Chakmate chu Category II-ah dah an ni.

Chakma Students Union-te chu Gauhati High Court-ah zualkoin, The Mizoram (Selection of Candidates for Higher Technical Course Sixth Amendment) Rules, 2015 chu an khing a; High Court chuan June 24, 2015-ah Mizoram sorkar chu Rules thar a siam chu hmang rih lo turin a hriattir a, chawlhkar thum chhunga insawifiah turin a ti.

Mizo zirlaite'n kuminah seat an chàn mai hlauhthawnna vangin Mizoram sorkar chuan High Court-a thubuai awm mek tihtawp a nih theih nan Chakmate chu Category I-ah a dah let leh ta a, chumi tur chuan July 1, 2015-ah The Mizoram (Selection of Candidates for Higher Technical Course) Seventh Amendment Rules, 2015 a tichhuak. High Court pawhin thubuai chu July 16-ah a titawp zui ve ta a ni.

MZP hruaitute chuan, Chakmate chu ram leilung fate an ni lo tih sawiin, STEE-ah pawh Category I-a an awm an remti thei lo tih an sawi a; academic session thar atana STEE kaltlanga technical course zir tur seat pekah pawh Chakmate chu Category-I ah seat pek an remti lo tih an sawi.

Zawhna chhangin Lalhmachhuana chuan, STEE paltlangte seat pekna turin tunlai hian HTE Technical Wing pisaah counselling tih mek a nih thu a sawi a, "Category I-ah Chakma zirlaite an luh lohna turin a tawp thlengin hma kan la dawn. Vawiinah pawh Technical Wing pisaah kan duty a, Category I-a dah luh tak zinga counselling-a inlan tum Chakma zirlai ṭhenkhat chu kan lo dang a ni," a ti.

MZP President sawi danin, Chakmate Category I-a dah an nih leh tak avang hian Chakma zirlai 13, STEE paltlangte chu Category II aṭangin Category I-ah dah luh an ni.

HTE-in allotment a pek chhuah mek chu NEC, DoNER leh hmun dang aṭanga seat hmuhte atan a ni a, medical bika Central pool-a Mizoram quota (seat 40 vel) erawh chu allotment a la chhuak lo thung.