Anganwadi-a thawk tha chawimawina hlan

Social Welfare department chuan, nimin khan an directorate conference hall-ah kum 2013-14 chhunga Best Anganwadi Worker leh Best Anganwadi Helper Award hlanna hun an hmang a; parliamentary secretary (Social Welfare) K Lalrinthanga'n a hmanpui.

K Lalrinthanga chuan, Social Welfare department chu mi dang tana thawktu a nih thu sawiin, an hnathawh avangin Mizoram naupangte'n hma an sawn zel a, Zoram dung leh vângah pian­phunga rualbanlo an tlem phah hlea a hriat thu a sawi. Anganwadi worker leh helper-te chu inpêkna thuk zawk nen thawk zel turin a chah.

K Lalrinthanga hian Best Anganwadi Worker leh Best Anganwadi Helper-te hnenah award a hlan. National award-in Rs. 25,000 leh thuchei a keng a, state level award-in Rs. 5,000 leh thuchei a keng thung.

Sorkar laipuia Ministry of Women & Child Development thupekin kum 1995 aṭangin anganwadi worker thawk ṭhate chawimawina pek ṭan a ni a; kum tin state tinin anganwadi worker thawk ṭha, national level award leh state level award dawng thei tur an thlang chhuak ṭhin.

Mizoram aṭangin mi 12-in national level Anganwadi Worker Award an dawng tawh a, tun­ah hian award dawng tura thlan fel tawh mi pathum an awm mek bawk.

Kum 2013-14 chhunga national level Best Anganwadi Worker Award dawngtu chu Lalzarzovi, Kolasib Anganwadi Centre-V a ni.