Phone tower radiation a hlauhawm lo Mobile phone a hlauhawm thei : BSNL

BSNL chief general manager DP Singh chuan, mobile phone tower-in radiation a pek chhuahte chu mihring hriselna atana hlauhawm tham a ni lo tih a sawi a, "Mobile phone erawh radiofrequency a pek chhuah tam avangin a hlauhawm thei," a ti.

BSNL hotute chuan nimin khan NLUP conference hall-ah thuthar thehdarhtute an kâwm a; DP Singh chuan internet chak ṭha nei turin mobile phone tower neih tam a pawimawh thu sawiin, "Mobile tower-in radiation a pek chhuah hi a hlauhawm anga sawi a nih ṭhin avangin an ina tower dah an hlau ṭhin," a ti a, mobile tower radiation chu a hlauhawmna finfiah a la nih lo tih mipuiin hre chiang se a duh thu a sawi.

BSNL CGM sawi danin, kum 2010 khan IIT, Bombay-a professor Girish Kumar chuan Department of Telecomunication (DoT)-ah report thehlutin, mobile tower-in a pek chhuah electrical magnetic force (EMF) radiation chu mihring hriselna atan a ṭhat loh thu a tarlang. Hemi chungchangah hian Allahabad High Court chuan sorkar chu committee din a, thil awm dan zir chiang turin a hriattir.

Court thupek ang hian sorkarin committee a din a, Prof. Girish Kumar pawh member-ah telh a ni. Committee chuan, Girish Kumar-a'n finfiahna a sawite chu science thiamna hmanga finfiahna awm lo vekah an ngai a ni.

BSNL CGM chuan, Prof. Girish Kumar chuan a newsletter tihchhuahah a fanuin EMF radiation laka invenna lamah sumdawnna a kalpui tih a tarlan thu sawiin, "Mahni hamṭhatna tur ûm luat vangin EMF radiation leh mihring hriselna chungchangah mipuiteah ngaihdan dik lo a darh ta a ni," a ti.

Girish Kumar sawi danin, mobile tower bula electromagnetic radiation awm phal chin chu milli watt (mW) 450 a ni. Sorkarin khauh taka hma a lak avangin kum 2014-15 chhung khan phal chin aia tam pe chhuak tower a awm lo.

Mizoramah chuan hmun pangaah tower endik a ni a, milli watt awm dan chu: Lengpui Airport-ah mW 0.25, Zemabawkah mW 0.23, Durtlangah mW 0.37, OCB main-ah mW 1.29 leh Aizawl Civil Hospital-ah mW 2.28 a ni.

World Health Organisation (WHO) tarlan danin, mobile phone-in radio frequency a pek chhuah chu a base station (mobile tower) aiin a let 1,000-in a sang zawk tih sawiin Girish Kumar chuan, "Mihring hriselna atan a ṭha lo a nih dawn chuan mobile handset zawk hi a hlauhawm tura ngaih a ni," a ti. Mobile phone hlauhawm leh awm loh zir chianna chu zawh ṭep a nih thu a sawi.

BSNL CGM chuan tower a tlem chuan hmun hniam leh âwl laiah mobile handset-te'n na zawka signal an pawh thu a sawi a, "Tower a tlem chuan mobile handset aṭanga signal chhuak a nasa zawk a, chuvangin, mobile tower tam zawk, signal ṭha zawk awm thei tura buatsaih a ṭul," a ti.