CM-in Indigenous Milk Product Plant a hawng

MULCO Complex, Ṭhuampuia Indigenous Milk Product Plant chu nimin khan chief minister Lal Thanhawla'n a hawng. He plant dinna atan hian NLUP sum Rs. 1,38,61,000 sên a ni.

Chief Minister chuan, Indigenous Milk Product Plant chu Mizoram tan hmasawnna rahbi thar a ni tih sawiin, "Sorkar department-a mithiamte'n ṭha­hnem an ngaih chuan minister-te pawh kan hming ṭha thei. Mithiam hmathlir ṭha tak neite hi ram tan an pawimawh hle. Hmasawn tum lo department-te chu a ngaiah an la awm char char a, kan thlen chin aṭang zelin kalphung thar leh ṭha zawk ngaihtuah chungin hmasawn kan tum tur a ni," a ti.

MULCO chu Mizorama society hlawhtling ber nia a hriat thu sawiin Lal Thanhawla chuan, "Thawktute hmalakna leh ṭhahnemngaihna vangin tun hi kan thleng a ni," a ti a; MULCO-in bawng­hnute bakah, bawnghnute aṭanga ei tur thianghlim chi hrang hrang - dahi (dhoi), lassi, ice-cream leh thil dang an siam chhuak chu ropui a tih thu a sawi.

AH&Vety minister C Ngunlianchunga pawhin thu sawiin, NLUP vang­in bawnghnute thar chhuah a pung tih a sawi.

Indigenous Milk Product Plant din tur hian June 24, 2013-ah a lungphùm phùm a ni a, July 18, 2014-ah a bun hna ṭan a ni. He plant hian ni tin bawng­hnute litre 5,000 a sawngbawl thei dawn a, toned milk, sterilised milk, paneer, curd, lasi, leh ghee-te siam chhuah a ni ang.