Southern Range-in crime review meeting an nei

Nimin khan Lunglei SP conference hall-ah DIG (Southern Range) Joseph Lalchhuana hoin 'Southern Range Half Yearly Crime Review Meeting' neih a ni a; nikum aiin kuminah thubuai ziah luh a tlem thu tarlan a ni.

Joseph Lalchhuana chuan, police-te chuan mihring leh an khawsak dan an zir zel tur an ni tih a sawi a; crime review meeting aṭangin tih dan ṭha zawk chhar ṭheuh tur leh hun vawng dik turin police officer-te a chah.

Meeting-a tarlan dan­in, 2014 kum chanve chhung khan DIG South­ern Range hnuaiah thubuai 197 ziah luh a ni a, kumin 2015 kum chanve chhungin 161 ziah luh a ni. January-June, 2015 chhung hian Lung­leiah case 91, Lawng­tlaiah 36 leh Saihaah 34 ziah luh a ni.

Meeting-ah hian 2nd Battalion MAP commandant C Lalruaia, Lunglei, Saiha leh Lawngtlai additional SP-te leh Lunglei, Hnahthial, Tlabung leh Chawngte SDPO-te an tel.