Kolasib-ah WRC Farmers’ Meet hmang

Agriculture department chuan, nimin khan Kolasib Diakkawn Hall-ah Kolasib district-a leilet neite tan intawh khawmna leh buh thar chungchanga thil pawimawh inhrilh­hriatna hun, 'WRC Farmers’ Meet' an buatsaih a, Agriculture minister R Lalzirliana'n a hmanpui.

Agriculture Minister chuan, tun dinhmunah Mizoramah industry lian tham din emaw, factory ropui bun emaw a harsa tih sawiin, "Leilung behchhan lo chuan eizawnna dang a awm lo. Khawvel hmun hrang hranga thlai an chìn hi Mizoram leilungah a chìn theih ve deuh vek a, mi rama an chìn ang leh an hlawhtlinnate hi ngati nge kan neih ve theih loh ang tih ngaituahna neih a ṭul," a ti.

Taima taka tunlai thiam­na hmanga huan, lo leh leilet enkawl a nih chuan rethei an awm a rin loh thu sawiin R Lalzirliana chuan, "Ram hmasawm leh hnam zahawm kan nih dawn chuan buh leh bâlah kan intodelh a ngai. Hei hi sorkar pawhin a ngai pawimawh a, ei leh bara intodelh chu sorkar thil tum ber a ni," a ti a; NLUP chu ram intodelhna tur programme a nih thu a sawi.

Parliamentary secretary (Agri.) Lt.Col. ZS Zuala pawhin thu sawiin, Kolasib hmun tam zawka leilet chu district council hun laia hruaitu hmasate'n harsa taka an ngaihtuah chhuah a nih thu a sawi a, "A theih chen chenah a ram neitu ngeiin an enkawl chuan buh thar a tam ngei ka beisei," a ti.

Farmers Meet-a tarlan danin, Agriculture department-in September 2014- a Kolasib district-a leilet neitu mi 805-te an zir chhiannaah, mi 64 chauhin anmahni ngeiin leilet an enkawl a, a dang zawng chu hnam dang an enkawltir tih hmuh chhuah a ni.

Kolasib district-ah hian leilet (WRC) nei chhungkua 1,377 an awm a, ram hectare 4,233-a zauah buh chìn mek a ni. Buh chin theihna ram awm chu hectare 9,429 vela ngaih a ni.