Kolasib-ah hmeichhe 3 chawimawi

Kolasib District Hub for Empowerment of Women leh Kolasib College-a Women's Cell & Internal Quality Assurance Cell (IQAC) chuan March 11, Thawhlehni khan Kolasib College hall-ah International Women's Day an hmang a; Kolasib district-a hmeichhe hlawhtling pathum hnenah chawimawina an hlan.

Kolasib district-a hmeichhe hlawhtling chawimawina an hlante chu - Lalremsiami (Olympian), Lalthansangi (national women's football referee) leh Vanlalhmangaihzuali (taekwondo international blackbelt)-te an ni.

Inkhawma khuallian Kolasib SP David H Lalthangliana chuan, dan hnuaiah mihring dikna chanvo humhalh chu mi tin mawhphurhna a nih thu a sawi a, "Hmeichhiate chunga hleilenna leh rahbehna hi India danpui palzûtna lian tak a ni. Ram dang ngaihtuahin Mizoram chu kan ṭha thawkhat niin a hriat a, chutihrualin, hmun ṭhenkhatah hmeichhiate rahbehna leh an chunga hleilenna a la awm ṭhin hi a pawi tak zet," a ti.

International Women's Day hi district programme officer C Vanlalzapa'n a kaihruai a, Kolasib College-a 6th semester zirlaite leh MHIP Sub-Hqrs Kolasib member-te an tel. Chief judicial magistrate Cacey Malsawmtluangi, Dr Malsawmi Pachuau leh Maj. Caroline Z Pachuau ten thu an sawi a ni.