MLA hluite'n Governor an kâwm

Former Lagislators Association, Mizoram (FLAM) hruaitute chuan nimin khan Raj Bhavan-ah Governor Gen. VK Singh an kâwm a; Mizoram Assembly House thar min sa tura an rawtna bawhzuisak turin an ngen.

FLAM hruaitute chuan, tun hnaia 16th Finance Commission hotute rawn zin hnenah Mizoram Legislative Assembly House thar sakna tur pe turin an lo dil tih sawiin, chu an dilna chu bawhzuisak turin Larsap an ngen a ni. Governor chuan, 16th Finance Commission hotute a sawipui tur thu sawiin, "A hlawhtling nan theihtawp ka lo chhuah ang," a ti.

Mizo thalai a tam thei ang ber sipai hrang hranga an luh theihna tur kawng dappui turin FLAM hruaitute chuan Governor an ngen a; Gen. VK Singh pawhin, Mizo ṭhalai tam tak sipaia an luh chu a vei ber zinga mi a nih thu leh, Prime Minister leh Home Minister pawh a sawipui tawh thu a lo hrilh.

FLAM hruaitute chuan, Governor chu Mizorama a awm chhungin Mizoram leh Mizote tan thil chhinchhiah tlak leh ro tling hnuchhiah ngei turin an ngen a; Governor pawhin Mizo ṭhalai, ruihhloin a tihbuai mekte chhan chhuahna kawngah ṭan la nasa lehzual turin a lo chah bawk.

FLAM hruaitute hi an president Liansuama hoin an thawk chhuak a; vice president Prof. JV Hluna, treasurer Rochhunga Rate leh, general secretary pathum - K Liantlinga, R Lalrinawma leh TC Pachhunga te an tel a ni.