YMA Village Profile Apps tlangzarh

YMA Village Profile Apps siam thar chu nimin chawhnu khan Central YMA president Lalhmachhuana'n CYMA Committee Room-ah a tlangzarh. YMA Village Profile App hi Aizawla branch parukah hman chhin phawt tura ruahman a ni a, Lailen Consulting Private Ltd siam a ni.

Report petu CYMA general secretary Prof. Malsawmliana chuan, app chu Mizoram sorkar nen ṭang tlanga siam a nih thu sawiin, village profile siamna atan Home department aṭangin cheng nuai 10 dawn a nih thu a sawi a, "YMA mai bakah sorkar tana data ṭangkai tak a ni dawn. Home department aṭanga cheng nuai 10 kan hmuh hian kum eng emaw chen a enkawl zui zelna tur a daih dawn a ni," a ti.