KHAWTHLIR

Bill pe ṭha lo

Power & Electricity minister F Rodingliana chuan nimin khan Assembly session-ah BJP member Dr K Beichhua zawhna chhangin, sorkar department zingah PHE, LAD leh AH&Vety department-te'n kawlphetha hman man (power bill) an pek ṭhat loh thu House a hrilh.

Dîl ṭanpuina sem

Champhai District Fisheries Development Office chuan nimin khan Champhai Kahrawt community hall-ah Pradhan Mantri Matsya Sampada Yojana (PMMSY) 2022-23 hnuaia sangha dil thar siamna atan mi 80 hnenah ṭanpuina Rs 45,360 ṭheuh an pe. Ṭanpuina pek hi a vaiin Rs 36,28,800 a ni a; Financial Literacy Campaign bakah, sangha dil siam dan te, tuikhuah enkawl dan leh common carp breeding chungchangte inzirtir a ni bawk.

Pa khawi inzirtir

ICFRE - Bamboo and Rattan Centre (ICFRE-BRC), Bethlehem Vengthlang buatsaih 'Training on Edible Mushroom Cultivation for ensuring Food Security' chu nimin khan khar a ni a; Agriculture & Farmers Welfare secretary Ramdinliani'n a hmanpui. Training hi ni hnih awh niin, Bethlehem Vengthlang mi 20 an tel a, master trainer Albana L Chawngthu-in pa chìn, khawi leh enkawl dan a zirtir a ni.

Naupang 110 thlang

Kum 2024-25 chhunga Mission Vatsalya (Child Protection Service) ṭanpuina (sponsorship) dawng tura naupang thlante nu leh pate tan nimin khan DC conference hall-ah thil pawimawh inhrilhfiahna hun hman a ni. Serchhip district-ah hian ṭanpuina dawng turin naupang 110 thlan an ni a, thla tin Rs 4,000 pek an ni dawn.

Khawl siam intihsiak

Nimin khan Siaha DC mini conference hall-ah Bána Kaih hnuaia Chief Minister’s Inventors Challenge-ah mimal hmasawnna tur leh khawtlang tana ro tling tur Hardware Innovation (khawl lam thil siam chhuahna) project siamah inelna buatsaih a ni. Table saw siamtu C Lalrinpuia, Vaihpi-III pakhatna niin, lawmman Rs 25,000 a dawng a, state level intihsiaknaah Siaha district aiawhin a tel ang.