Serlui-B HEP chei ṭha leh turin sum a ngai tam - Power Minister

Power & Electricity minister F Rodingliana chuan nimin khan MNF member Lalrinsanga Ralte zawhna chhangin, Serlui-B Hydro Electric Power Project (HEP) chei ṭha leh tur chuan sum a ngaih tam thu House a hrilh.

F Rodingliana chuan, Serlui-B HEP-ah an sorkar tirhin hma an lak nghal thu sawiin, "Study team insiamin kan intir. Serlui-B hi chei ṭha leh tur chuan cheng vaibelchhe tam tak a ngai. Tun dinhmunah chuan chei ṭha leh tur hian kan sum dinhmunin a zir lo a, megawatt tam vak lo pe chhuakin a theih ang angin kan kalpui mek," a ti.

Serlui-B HEP-ah khawl pathum megawatt 4 ṭheuh pe chhuak thei tur bun a nih thu sawiin Minister chuan, "Tunah chuan khawl pakhat kan run thei ṭâwk. Khawl danga a part-te la khawmin kalpui a ni," a ti a; a part thar lei turin company a hlui tawh avangin a buaithlak tawh thu a sawi.