PAHOSS chhunzawm dawn lo

UDPA minister K Sapdanga chuan nimin khan ZPM member VL Zaithanzama zawhna chhangin, sorkar hmasain an kalpui Parking House Support Scheme (PAHOSS) chu kalpui chhunzawm tum a ni lo tih House a hrilh.

UDPA Minister chuan, PAHOSS atana Mizoram sorkar sum sèn zat zawhna chhangin "PAHOSS atana Mizoram sorkar sum sen ral zat chu cheng nuai 1,136.4 a ni," a ti.

ZPM member T Lalhlimpuia zawhna chhangin K Sapdanga chuan, Lunglei Municipal Council tan draft rules siam a awm chiah lo tih a sawi a, "Regulations erawh chu Cabinet-in pathum a pawm tawh," a ti a; LMC tan draft regulations pakhat Cabinet la pawm loh a awm thu a sawi.

UDPA Minister sawi danin, Cabinet-in LMC tana regulation a pawm tawhte chu - The LMC (Control of Parking Collection of Parking Fees) Regulations, 2024 te, The LMC (Display of Advertisment & Hoarding) Regulations, 2024 leh, The LMC Licensing Regulations, 2024 te a ni.

Cabinet-in a la pawm loh chu The LMC Building Regulations, 2025 a ni a, pawm a la nih loh chhan chu department chhungah zirchianna neih leh mek vang a ni. Siamṭhat ngaite siamṭhat a nih hnuah Cabinet pawmpui turin thawn a ni ang.