KHAWTHLIR

Lehkhabu lehlin ṭha

Mizo Writers' Association chuan ṭawng danga lehkhabu ziah, Mizo ṭawnga lehlin kum 2024 chhunga chhuak zinga ṭha ber an thlan mekah a ṭha zual pathum an thlang chhuak tawh a; chu'ngte chu - 'Hringnun thawnthu ril' (C Ramdinmawia), 'Pa hausa pa rethei' (Lalrinzuala Pachuau) leh 'The 5 Points of Calvinism' (F Lalremsiama) te a ni.

Awareness lecture

Assam Rifles chuan March 12, Nilaini khan Mizoram chhim lama Laitlang khuaah No Smoking Day pualin awareness lecture an buatsaih a, tualchhung mi eng emaw zat an tel. Vaihlo zuk leh hmuamin hriselna a tihchhiat dante leh zuk leh hmuam laka fihlim ṭhatnate inzirtir a ni.

Ramvah khap

Champhai district bawrhsap Mohammed Aaquib chuan thupek chhuahin, Champhai district-ah ṭul loa ram tihkan leh mei chhuah palh a awm loh nan silai kenga ramvah khap a nih thu a puang. Thupek zâwm lote chu BNS Section 223 hmanga hrem theih an nih thu a tarlang.

DCC ṭhukhawm

Kolasib District Consultative Committee chu nimin khan an chairman Robert C Lalhmangaiha, bawrhsap kaihhruaiin an ṭhukhawm a; October - December 2024 chhunga Kolasib district-a bank 14 leh an hnuaia branch hrang hrangte hmalak dan leh hmachhawpte thlirho a ni.

Lawmthu sawi

BJP, Mizoram chuan thuchhuah siamin, CADC-a VC inthlan neih zawh takah VC 88 awm zinga 64-ah BJP an chak chu an lawm thu an tarlang a, BJP-ah mipuiin rinna an nghah ang ngeiin hmasawnna an hmuh theih nan BJP, Mizoram chuan hma an lakpui dawn thu an sawi.

MMR sawiho

Aizawl bawrhsap Lalhriatpuia hoin nimin khan DC conference hall-ah Maternal Death Review Meeting (nu nau chunga thihna chungchang thlirletna) neih a ni a; nu nau chunga thite thih chhan zirho a nih bakah, nau chunga nu thihna tihtlem dan tur sawiho a ni.