Khawl siam intihsiakna buatsaih

Lunglei leh Champhaiah nimin khan Bána Kaih scheme hnuaia mimal hmasawnna tur leh khawtlang tana ro tling khawl lam thil siam chhuah (hardware innovation)-a inelna, Chief Minister’s Inventors Challenge buatsaih a ni.

Lungleiah chuan District Innovative Challenge Committee chairman Navneet Mann, DC kaihhruaiin inelna buatsaih a ni a; hmarcha chi (seed) lakna khawl siamtu Ramdinmawia, Haulawng chu pakhatna niin, Rs 25,000 a dawng. Pahnihna Chhuan­mawia, Haulawng, puantahna khawl siamtu niin, pathumna JH Lalramzauva, Lunglawn, leirawhchan siamna khawl siamtu a ni.

Champhaiah chuan District Innovative Challenge Committee chairman Mohammad Aaquib, bawrhsap kaihhruaiin inelna buatsaih a ni a; pakhatna chu Zoramchhana, Chhungte (KD controller pump) niin, Rs 25,000 a dawng. Lalruatfela, Champhai Kanan leh R Lalhruaitluanga, Champhai Vengthlang North te pahnihna leh pathumna an ni.

District level inelnaa pahnihnain Rs 15,000 leh pathumnain Rs 10,000 an dawng a; pakhatnate chu Mizoram pum huap intihsiakah an district aiawhin an tel dawn a ni.