Dampa YMA-in inkhawmpui hmang

YMA, Dampa Group chuan March 12, Nilaini khan Damparengpuiah inkhawmpui vawi 49-na an hmang ṭan a, nimin khan Central YMA president Lalhmachhuana'n a hmanpui. Dampa Group YMA-ah hian branch 12 awmin, member 3,735 an awm a, mipa 2,563 leh hmeichhia 1,172 an ni. Inkhawmpui hi zaninah a ṭiak ang.

CYMA president Lalhmachhuana chuan, ṭhenawm ramah Zo hnathlakte'n harsatna an tâwk tih sawiin, "Lo tuamhlâwm nasa bertu chu YMA kan ni. Zo fate tan YMA hi a hlu hle a, a la hlu tual tual dawn. YMA hlut chhan hi CYMA hruaitute vang a ni lo a, YMA member zawng zawng vangin a hlu a ni. YMA hi hian kohhran a thliar hrang lo a, political party huapzo páwl a ni," a ti.

Mizoramah ruihhlo a hluar hle tih sawiin CYMA President chuan, "Kan rama ruihhlo nasa taka pung mek hi lo dang a, lo veng theitu chu YMA kan ni," a ti a; ruihhlo vangin Mizo mipa an thi nasa a, chumi vanga Mizote chîmrala an awm loh nan YMA member-te'n nasa lehzuala ruihhlo an do a ṭul thu a sawi.