Sorkar leh mipui inkara palai an ni tih hre reng turin MIS officer-te chah

Mizoram Information Service Association (MISA) chuan nimin khan IPR Lianchhiari Rûnah Annual Conference an hmang a; Information & Public Relations (IPR) minister Dr Vanlalthlana'n hmanpuiin, MIS officer-te chu sorkar leh mipui inkara palai hna thawktu pawimawh an ni tih hre reng turin a chah.

IPR Minister chuan, MIS officer-te chu sorkar leh mipui inkara palai hna thawktu pawimawh tak an ni tih inhre reng tura a chah bakah, khawvel thiamna ṭhang zelah intuaithar reng tur leh inzir thar zel turin a chah a; an hnathawh hrang hrangah thil thar leh ṭangkai ngaihtuah chhuah tuma rilru séng zel turin a fuih.

Dr Vanlalthlana chuan, IPR department-in mipui rawngbawl hna sâwt zawka a thawh theih nan amah finchhuah zel turin MISA member-te a chah a; MIS officer leh IPR department-a thawktu indaih lohzia a hriatpui thu leh bungraw mamawhte phuhrûk a nih theih nan theihtawp a chhuah tur thu a sawi bawk.

MISA inkhawmpuiah hian hmun hrang hranga MIS officer-te an tel a; IPR deputy director Pratap Chhetri-a'n a kaihruai. IPR director C Lalnunkima chuan, MIS officer-te chu sorkar leh mipui thlun zawmtu an ni a, district-a IPR office-ah hna ṭha taka a kal theih nan lirthei mamawhna a sàn thu a sawi.

MISA president Malsawm-sanga tarlan danin, MIS junior grade post awm zinga 44% chiah hnawhkhah niin, 56% a ruak a; Aizawl district vil tur IPRO pakhat chauh a awm. MIS officer-te'n sâwt zawka hna an thawh theih nan leh an thiamnate an tah hriam zel theih nan 'The Mizoram Information Service Training Regulations, 2024' duan tawh a ni.